هرات | ۱۹ جوزا ۱۴۰۵
د حضرت ابوبکر صدیق رضی الله عنه جامع جومات، چې د حبیبیار خیریه بنسټ په مالي ملاتړ جوړ شوی، د یوې پرتمینې غونډې په ترڅ کې، چې د علماوو، علمي شخصیتونو، مخورو، قومي مشرانو، سوداګرو، د خیریه بنسټونو د استازو او د خلکو د بېلابېلو قشرونو ګڼ شمېر کسانو پکې ګډون کړی و، په رسمي توګه پرانیستل شو او ګټې اخیستنې ته وسپارل شو.
په دې مراسمو کې خیرخواه سوداګر الحاج محمد ابراهیم حبیبیار هم ګډون کړی و. نوموړي له نورو مېلمنو سره یوځای د دغه مهم دیني او فرهنګي مرکز پرانیسته د اسلامي ارزښتونو د ترویج، د یووالي د پیاوړتیا او ټولنې ته د خدمت په برخه کې یو ارزښتناک ګام وباله.
دغه جامع جومات د هرات ښار د کارته په سیمه کې په دوو پوړونو کې جوړ شوی او په یو وخت کې د شاوخوا ۵۰۰ لمونځ کوونکو د ځایولو ظرفیت لري. د دغه پروژې د پلي کولو موخه د لمانځه د ادا کولو، د دیني، ښوونیزو او فرهنګي پروګرامونو د ترسره کولو لپاره د مناسب چاپېریال برابرول او د سیمې د اوسېدونکو دیني اړتیاوو ته رسېدنه ده.
د مراسمو ویناوالو د حبیبیار خیریه بنسټ له ملاتړ څخه د قدردانۍ ترڅنګ، دغه اقدام د ټولنیز مسؤلیتپالنې او د هېواد د دیني زیربناوو د پراختیا په برخه کې د پاملرنې یوه ارزښتناکه بېلګه وبلله. هغوی همداراز د ټولنیز یووالي د پیاوړتیا، د اسلامي معارف د ترویج او د راتلونکي نسل د سالمې روزنې په برخه کې د جوماتونو پر مهم رول ټینګار وکړ.
حبیبیار خیریه بنسټ تل هڅه کړې چې د بشري مرستو د پروګرامونو د پلي کولو او له اړمنو قشرونو څخه د ملاتړ ترڅنګ، د دیني، ښوونیزو او عامالمنفعه مرکزونو د جوړولو او پراختیا په برخه کې هم اغېزمنه ونډه واخلي. د حضرت ابوبکر صدیق رضی الله عنه د جامع جومات پرانیسته او ګټې اخیستنې ته سپارل د ټولنې د خدمت او د راتلونکو نسلونو لپاره د دوامدارو زیربناوو د رامنځته کولو په موخه د دغه بنسټ د هڅو یو بل مهم ګام بلل کېږي.
حبیبیار؛ د همکارۍ او انساندوستۍ بېلګه
No comment