حبیبیار خیریه بنسټ له اړمنو کورنیو سره د مرستې په موخه د یوه بشري اقدام په ترڅ کې د ژمنیو مرستو لومړنۍ کاروان فراه او نیمروز ولایتونو ته واستاوه. په دې کاروان کې ۶۰۰۰ سهمیې خوراکي توکي لکه غوړي او اوړه شامل دي چې له هرات ولایت څخه دغو دوو محرومو ولایتونو ته روان شوي دي.
همدا راز د دغه خیریه اقدام په دوام به د دغه بنسټ دوهم کاروان چې ۶۰۰۰ بوجۍ وریجې په کې شاملې دي، له کندهار ولایت څخه فراه او نیمروز ته ولیږدول شي. دغه مرستې د ژمي په ساړه موسم کې د بې وزلو کورنیو د لومړنیو اړتیاوو د برابرولو په موخه ترسره کېږي.
د حبیبیار خیریه بنسټ تل هڅه کوي چې د داسې مرستندویه اقداماتو په ترسره کولو او د هغوی د لومړنیو اړتیاوو په برابرولو سره د زیانمنو شویو کورنیو په زخمونو مرحم وکړي، د ټولنیزو ستونزو په راکمولو او د دغو کورنیو د ژوندانه په ښه کولو کې رول ولوبوي.
دا کړنې نه یوازې د اړو کورنیو لپاره ژمنې او اغیزمنې دي، بلکې د پیوستون او ټولنیز مسؤلیت نمونه هم ښیي. حبيبيار خيريه بنسټ د ټولنې له زيانمنو شويو طبقو سره د مرستې په برخه کې خپلو ژمنو ته دوام ورکوي او هيله لري، چې په دې برخه کې د ستونزو په کمولو کې اغېزمن ګام پورته کړي.