د سه شنبه په ورځ (۱۴۰۳/۸/۸ نیټه) د الحاج محمد ابراهیم حبیبیار خیریه بنسټ لخوا د شپیتو ځوانانو د ډله ایز واده مراسم ترسره شول. په دې مراسمو کې د یادو کورنیو او خپلوانو سربېره د فراه ولایت والي، د اناردرې ولسوال او مسوولینو، د اناردرې ولسوالۍ د خلکو د ټولنیزو شوراګانو رئیسانو او مسوولینو او همدا راز یو شمېر مېلمنو، علماوو او یو شمېر کسانو ګډون کړی و. په دې مراسمو کې د هرات، کابل او نیمروز ولایتونو مشرانو هم برخه اخیستې وه.
هر ویناوال په اسلام کې د واده پر اهمیت او مقام او همدارنګه د کورنۍ د جوړولو په برخه کې د همکارۍ په اړه خبرې وکړې او ډله ییز ودونه یې یو له خورا ارزښتناکو شیانو څخه یاد کړل. دوی وویل، فقر او اقتصادي ستونزو د ځوانانو لپاره د کورنۍ جوړول ستونزمن کړي دي، چې په ټولنه کې د سوداګرو او مخورو پام، همکارۍ او ګډون ته اړتیا لري. دغه راز ويناوالو د خپلو خبرو په ځينو برخو کې د افغانستان د وتلي سوداګر الحاج محمد ابراهيم حبيبيار سپېڅلې کړنې وستايلې او د لوى خداى (ج) له دربار څخه يې ورته د لا زياتو برياوو غوښتنه وکړه.
په دې وروستيو کې د حبيبيار خيريه بنسټ عمومي مسول مولوي عبدالحق صديقي د دغه بنسټ د فعاليتونو په اړه معلومات ورکړل او يادونه يې وکړه چې دغه بنسټ د افغانستان په ډېرو برخو کې مرستې کړې او حتی په بېړنيو حالاتو کې له خپلو ګرانو هېوادوالو سره اوږه په اوږه ولاړ دي، محترم مولوي صدیقي د خپلو خبرو په یوه برخه کې یادونه وکړه چې د دغه بنسټ مشرتابه هوډ لري چې په راتلونکي کې هم د لا زیاتو پروګرامونو او فعالیتونو په ترسره کولو سره خپلو خلکو او ټولنې ته خدمت وکړي.
د يادونې وړ ده، چې په یادو مراسمو کې هرې جوړې ته له (۸۰) څخه زياد ډوله د کور توکي ووېشل شول.